Киелітастың өндірісінде серпіліс бар
Тәуелсіз Қазақстанның даму жолында индустрияландыру – экономиканың драйверіне айналған басты бағыттардың бірі. Бұл – Ел Президенті Қасым-Жомарт Тоқаевтың «Әділетті Қазақстан – бәрімізге ортақ ел» тұжырымдамасында ерекше мән беріп отырған маңызды басымдық. Мемлекет басшысы өз Жолдауларында еліміздің өңірлік теңгерімін сақтай отырып, әрбір аймақтың әлеуетін толық іске қосуды міндет етіп қойды. Осы тұрғыда Түркістан облысы, соның ішінде Төлеби ауданында орналасқан Киелітас ауылдық округі инвестициялық орталыққа айналуда.
Инвестициялық тартымдылықты арттыру мақсатында Киелітас ауылдық округінде жалпы көлемі 100 гектарды құрайтын индустриялық аймақ құру жұмыстары қарқынды жүргізілуде. Жоба аясында қажетті инфрақұрылымға 3,9 млрд теңге көлемінде қаржы қарастырылып отыр. Бұл бастама аймаққа отандық және шетелдік инвесторларды тартуға мүмкіндік береді. Сонымен қатар, «Түркістан» әлеуметтік-кәсіпкерлік корпорациясы тарапынан қолдау тапқан 14 гектарлық шағын өндірістік парктің құрылысы да жоспарда бар. Мұнда жалпы құны 20 млрд теңге болатын 5 ірі инвестициялық жоба жүзеге аспақ. Осы жобалар нәтижесінде 400 жаңа жұмыс орны ашылып, жергілікті халықты тұрақты жұмыспен қамту мәселесі шешімін табады.
Шағын өндіріс бойынша іске асырылатын жобалар қатарында: «Alpecon Group» ЖШС – жемістер мен көкөністерден шырын, концентрат, езбе мен паста өндіретін зауыт (9,2 млрд тг, 130 жұмыс орны), «Зерде-Фарм» ЖШС – биологиялық белсенді қоспалар, коллаген, витаминдер және пробиотиктер өндірісі (5 млрд тг, 180 жұмыс орны), «Smart Cab» ЖШС – кабельдік науалар өндіретін зауыт (2,8 млрд тг, 35 жұмыс орны), «Rich Style» ЖШС – кіші темір бұйымдарын шығаратын цех (1,5 млрд тг, 25 жұмыс орны), «Green Chemical» ЖШС – тұрмыстық химия өндіру жобасы (1,5 млрд тг, 30 жұмыс орны) бар. Бұл жобалар еліміздің индустриялық-инновациялық дамуына серпін беріп қана қоймай, импортты алмастыру саясатына да сай келеді. Мемлекет басшысы Қасым-Жомарт Тоқаев өз Жолдауларында: «Экономикалық өсімнің жаңа моделін қалыптастыру үшін индустрияландыруға тың серпін беруіміз қажет», – деп атап өткен болатын.
Киелітас ауылдық округінде жүзеге асып жатқан бұл жобалар – Президент тапсырмаларының жергілікті деңгейде нақты іске асуының көрінісі. Сондай-ақ, Парламент пен Үкіметтің отандық өндірісті дамыту, инвестициялық климатты жақсарту бағытындағы саясатының нәтижесі ретінде бұл жобалар жергілікті атқарушы органдардың үйлесімді жұмысы арқылы жүзеге асырылып жатыр. Түркістан облысының әкімдігі мен жергілікті өзін-өзі басқару ұйымдарының үйлесімді іс-қимылы, өңірдің стратегиялық артықшылықтарын тиімді пайдалану – өңір экономикасының өсуіне оң ықпал етуде. Жобалар шеңберінде құрылатын жаңа жұмыс орындары – тек халықты жұмыспен қамтудың құралы ғана емес, сонымен қатар өңірде әлеуметтік тұрақтылықты сақтаудың маңызды тетігі. Жас мамандарды тарту, кәсіби қайта даярлау курстарын ұйымдастыру арқылы адам капиталының сапасы да артатыны сөзсіз.
Жалпы, индустриялық аймақ пен өндірістік парк – бұл болашаққа бағытталған ұзақ мерзімді стратегиялық қадам. Мұндай инфрақұрылымдық жобалар арқылы Түркістан облысы ел экономикасының қуатты тірегіне айналмақ. Бұл жобалар – Мемлекет басшысының өңірлік дамуға, инвестиция тартуға және жаңа жұмыс орындарын ашуға бағытталған тапсырмаларының нақты орындалуы.
Киелітас ауылдық округінде құрылатын индустриялық аймақ пен өндірістік парк – Түркістан облысының экономикалық әлеуетін арттырып, жергілікті халықтың әл-ауқатын жақсартуға зор мүмкіндік береді. Бұл – әділетті әрі өркендеген Қазақстанға қадам. Осы бастамалар аясында кәсіпкерлікке қолайлы орта қалыптасып, шағын және орта бизнестің дамуына жол ашылады.
Жергілікті ресурстарды тиімді пайдалану арқылы өндірістің әртараптандырылуы қамтамасыз етіліп, аймақтың бәсекеге қабілеттілігі артады. Бұл – тек экономикалық өсім емес, сонымен қатар тұрғындардың өмір сапасын арттыруға бағытталған жүйелі әрі ұзақмерзімді даму стратегиясы.
