Ұрпақ тәрбиесінде әкелердің рөлі зор
Сайрам ауданында қоғамдағы өзекті мәселелердің бірі саналатын — ұрпақ тәрбиесіне қатысты семинар өткізілді. «Ұрпақ тәрбиесіндегі бетбұрыс» атты тақырыпта өткен іс-шара облыстық ардагерлер кеңесінің ұйытқы болуымен ұйымдастырылды. Алқалы басқосуға облыстық ардагерлер кеңесі төрағасының бірінші орынбасары Әбдішүкір Сапарбеков, аудан әкімінің орынбасары Мадияр Әліпов, аудандық ардагерлер кеңесінің төрағасы Ілес Айтжан және аудандық ардагерлер кеңесінің мүшелері, аудандағы мектептердің тәрбие ісі жөніндегі орынбасарлар мен зиялы қауым өкілдері қатысты.
Семинар-кездесу барысында облыстық ардагерлер кеңесі төрағасының орынбасары Әбдішүкір Сапарбеков ұрпақ тәрбиесі және бұл бағытта ардагерлер кеңесінің атқарып жатқан жұмыстары мен алдағы жоспары жайлы жан-жақты баяндама жасады. Жиналған көпшілікке бүгінгі өскелең ұрпаққа тағылымды тәрбие беретін ақыл-кеңестер айтылды. Өз кезегінде аудан зиялылары да жеткен жетістіктер мен кеткен кемшіліктерге тоқталды.
Жиналған көпшілік осындай маңызды мәселе төңірегінде қоғам болып күресіп, ауызбіршіліктің үлгісін көрсету керекпіз деп тарасты.
Айта кетейік, бүгінгі таңда жастарды ұлттық рухта тәрбиелеп, отбасылық құндылықтарды жаңғыртуда, жасөспірімдер арасындағы құқық бұзушылықтың алдын алуда, суицидтің азаюына ықпал ету ісінде де облыстық ардагерлер кеңесі маңызды рөл атқарып келеді. Барлық 17 аудан, қала, сондай-ақ, 902 білім ошағындағы аталған құрылым тәрбие жұмыстарын нәтижелі жүргізуде. Мектеп оқушыларының жас ерекшеліктері ескеріліп, «Тәрбие талбесіктен басталады» атты әдістемелік нұсқаулық дайындалып, таратылды.
Облыстық ардагерлер кеңесі Мемлекет басшысы қолдауын басшылыққа ала отырып, өңіріміздегі бірқатар аудан, қалаларда «Ұрпақ тәрбиесіндегі бетбұрыс» тақырыбында облыстық көшпелі семинар ұйымдастырылуда. Жоғарыда соның бірі ретінде Сайрам ауданында өткен іс-шараны айтып өттік.
Облыстық ардагерлер кеңесі «Әкелер мектебі» мен «Әжелер алқасының» ұрпақ тәрбиесіндегі жұмыстарын бір арнаға тоғыстырып, «Ата – әулеттің тірегі, әже – ұрпақтың жүрегі» бағдарламасы аясында танымдық-тәрбиелік бағыттағы жұмыстарды да жандандыруды мақсат етіп отыр.
— Облыстық ардагерлер кеңесін 17 аудан-қалалық ардагерлер кеңесіне біріктірілген 619 бастауыш (ауылдық) ардагерлер ұйымы құрайды. Қарияларымыздың арасында 11 ҰОС ардагері, 3522 тыл ардагері бар. Ардагерлер саны 2023 жылмен салыстырғанда 11733 адамға, 4%-ға өсті. Бастауыш ардагерлер ұйымы 536-дан 619-ға жетіп, яғни 83 ұйымға көбейді. Бастауыш ардагерлер ұйымдарының рөлін арттыру, жас ұрпақ тәрбиесіне және ардагерлер қозғалысының дамуына игілікті үлес қосып жүрген аудан-қалалардағы азаматтарымызға айтар алғысымыз мол.
Әсіресе, Қазығұрт, Келес, Жетісай, Түлкібас, Созақ аудандық және Арыс қалалық ардагерлер кеңесі төрағаларының нәтижелі жұмыстарын атап өткен жөн.
Қарияларға қамқорлық жасау ешқашан ұмыт қалған емес. Мысалы, Жеңіс мерекесі қарсаңында ҰОС ардагерлеріне бюджет есебінен
22,5 млн. теңге, тыл еңбеккерлеріне 142,2 млн. теңге көмек берілді. Тағдырдың жазуымен қартайған шағында жалғыз қалған қарияларымыз да мемлекет қамқорлығында. Атап айтқанда, 80 жастан асқан жалғызілікті 1605 қарияның зейнетақысына қосымша бір айлық есептік көрсеткіш (АЕК) мөлшерінде көмек көрсетіліп, 235 ардагерді газет-журналдарға жеңілдікпен, ал, 4365-ін тегін жаздырдық. Санаториялық-курорттық емделуге 8427 ардагер жіберіліп, денсаулықтарын түзеді.
Өткен жылы «Әжелер алқасының» құрылғанына 10 жыл толуына орай барлық аудан, қалаларда және 528 елді мекенде іс-шаралар ұйымдастырылып, Түркістан қаласында «Әже – ұлт ұйытқысы, тәрбие бесігі» атты облыстық «Аялы әже» форумы өтті. Бұл құрылымның жұмысына облыста 75326-ға жуық белсенді, өнерлі, сан-саладағы еңбегімен елге сыйлы болған, өрелі ұл-қыз өсіріп, үлкен әулеттің киесіне айналып отырған абзал ана-әжелер қатысты. Олар жас ұрпаққа, қоғамға өмір сабағын үйретуде десек болады, — дейді облыстық ардагерлер кеңесінің төрағасы Ж. Мәуленқұлов.