Түркістан – рухани және тарихи елордамыз
Мемлекет басшысы Қ.К.Тоқаев Түркістанға қаласына жасаған ресми сапарында Түркістанға тарихи және рухани елорда мәртебесін беруді ұсынған болатын.
«Түркістан – бәріміздің мақтанышымыз, екі дүние есігі, ер түріктің бесігі атанған бүкіл әлемге танымал қасиетті жер. Осы киелі шаһардың төл тарихымызда айрықша орны бар. Түркістан төріндегі Қожа Ахмет Ясауи кесенесі – руханиятымыздың мызғымас діңгегі. Сондықтан Түркістанға, жалпы, осы облысқа ерекше мән беруіміз керек», – деді Президент.
Бүгінде Түркістан қаласы жаңа заманға сай қайта түрленіп келеді. Қала ілгерілеу мен жаңарудың үлгісіне айналып отыр. Қазір мұнда тартылған инвестиция көлемі 8 есе артқан. 77 мың адамға арналған көпқабатты үйлер салынған. Сонымен қатар шаһар жасыл-желекке оранып, экологиялық ахуалы жақсарған. Тұрғындарды ауызсумен және табиғи газбен қамтамасыз ету мәселесі шешілді деп айтуға болады. Рухани қаланы көруге келген туристердің де қатары артқан.
