Үсенова консервіленген өнім өндіруде

Өңірімізде мемлекеттік қолдаудың игілігін көріп, жеке кәсіппен айналысып отырған көпбалалы аналар саны артқан. Солардың бірі – А. Усенова. Ағымдағы жылда 1 476 800 теңге көлемінде қайтарымсыз грант алып, қазір өз кәсібін дөңгелетіп отыр.

Аймақта бизнес-жобаларын ұсынып, кәсіп бастап жатқан азаматтар саны жетерлік. Солардын бірі – үй шаруашылығында отырып кәсіптің көзін тапқан көпбалалы ана А. Усенова. Ол консервіленген өнім өндірумен айналысады. Қазір үйде отырып-ақ, түрлі тапсырыстарды қабылдайды.

А. Усенова кәсіпкер ғана емес, ең алдымен аяулы ана. Төрт бала тәрбиелеп, өсіріп отыр. Қазір кәсіпкердің тапсырыстары күннен-күнге артып, тұрақты клиенттері де пайда болған. Кәсіпкердің айтуынша, кәсіп бастар алдында өзіңе деген сенімділікті жоғалтпай, белсенді әрекеттерден қорықпау керек.

Жалпы қазір кәсіп бастаймын деген адамға бүгінде мүмкіндік көп. Мемлекет қайтарымсыз грант негізінде және жеңілдетілген несие беру арқылы бизнес-идеямды жүзеге асырамын деген адамға барынша қолдау көрсетіп келеді. Мәселен, өткен жылы 6 мыңға жуық адам 2,5 пайыз мөлшерлемемен несие алып, өз кәсіптерін бастаған. Ал, 9 мыңнан астам қазақстандық қайтарымсыз грант алыпты.

Мұндай қолдау биыл да жалғасын табуда. Биыл 5,8 мың адамның несие алуына 29 млрд. теңге бөлініп, тағы 9 мың азамат қайтарымсыз грант алу мүмкіндігіне ие бола бастады. Грант көлемі 400 АЕК-ті (1 476 800 теңге) құрайды. Ол үшін 13 млрд. теңге қарастырылған. Оған өтініш беру 8 сәуірден басталады. Алғашқы лекте 4500 адамға грант беру жоспарланған болатын. Бұл қаражат ісін жаңа бастаған кәсіпкерлерге өздерінің бизнес-әлеуетін ашуға, өндірісті жолға қоюға және дамытуға, сол арқылы өзін тұрақты табыспен қамтамасыз етуге мүмкіндік беруде.

Жалпы қайтарымсыз грантқа әр қатысушы оны тек бір рет қана ала алады. Өтініш «Business.enbek.kz» порталы арқылы қабылданады. Қайтарымсыз грантқа қол жеткізудің талап-тәртібі мен ереже-шарты қандай, соған тоқталайық.

Қайтарымсыз қаражатқа өтініш беру үшін порталда тіркеліп, грант алу шарттарына сәйкестігіне тексеруден өту керек. Сосын бизнес-жоспар үлгісін жүктеп алып, оны толтырып порталға енгізесіз. Одан кейін өтініш нысанын толтырып, ЭЦҚ кілтімен қол қою қажет. Егер интернетке немесе компьютерге қолжетімділік болмаса, халыққа қызмет көрсету орталығы немесе мансап орталықтарының өзіне- өзі қызмет көрсету аймағына барсаңыз болады.

Айта кетейік, қайтарымсыз грант аламын деген адам жұмыссыз ретінде тіркелген болуы керек. Немесе кемі 3 жыл жеке кәсіпкер ретінде тіркелген болуы шарт. Оған қоса, үміткер төмендегі әлеуметтік санаттардың бірінен болуы міндетті:

* мүгедектігі бар адамдар;

* қолданыстағы «қандас» мәртебесі бар адамдар;

* өңіраралық қоныс аударушылар;

* аз қамтылған отбасы мүшелері;

* көп балалы отбасы мүшесі (жұбайы / зайыбы);

* мүгедектігі бар баланы тәрбиелеп отырған адам (жұбайы / зайыбы);

* асыраушысынан айырылу бойынша жәрдемақы алушылар.

Сондай-ақ, үміткердің «Бастау-бизнес» жобасы бойынша кәсіпкерлік негіздеріне оқыту туралы 3 жылдан аспайтын мерзімге сертификаты болуы тиіс. Қаржыны қажетті құрал-сайман, еңбек құралдарын, технологиялық жабдықтар, мал, жануар, құстар сатып алуға, көшет, бұталарды, тұқымдарды сатып алу үшін, сондай-ақ, кәсібін жүргізуге арналған орын-жайларды жалға алу ақысын төлеуге алуға болады. Бұл қаржы тұтынушылық мақсатқа, кредиттік қарыздарды өтеуге, жылжымайтын тұрғын үй  немесе жер учаскелерін алуға берілмейді.

Үміткерлердің өтінішін Еңбек мобильділігі орталықтарындағы арнайы комиссия қарап, саралайды. Үміткерлер өз бизнес-жобасын комиссия отырысында таныстырады. Комиссия мүшелері бизнес-идеяның бәсекеге қабілетті болуы мен өміршеңдігіне, үміткердің кәсіпкерлік дағдыларына мән береді. Жаңа жұмыс орындарын құру да комиссия баса мән беретін жайлардың бірі. Комиссия шешімі үміткердің Порталдағы жеке кабинетіне жіберіледі. Егер грант беру мақұлданған болса, үміткер банк деректемелерін ұсынып, шартқа қол қояды. Содан кейін әр тоқсан сайын қаражаттың қайда, қалай жұмсалғаны жайлы есеп беріп отыруы тиіс.