Балалардың қауіпсіздігі – басты назарда
Жақында Үкімет отырысында оқу-ағарту министрі Ғани Бейсембаев білім беру ұйымдарының инфрақұрылымын жақсарту және балалардың қауіпсіздігін қамтамасыз ету мәселесіне тоқталды.
Бүгінде Қазақстанда 7859 мектеп бар, онда 3,9 млн бала білім алады. Үшауысымды мектептер мен оқушы орнының жетіспеушілігін жою мақсатында биылғы жылы 302 жаңа мектептің құрылысы жоспарланған. Осы тамыз айында жаңа оқу жылы басталғанға дейін «Жайлы мектеп» ұлттық жобасы бойынша алғашқы 20 нысан пайдалануға беріледі.
Балаларға жайлы орта қалыптастыру мақсатында 280 білім беру ұйымында күрделі жөндеу жүргізілуде. Су тасқыны салдарынан зардап шеккен нысандар қайта қалпына келтірілуде. Сонымен қатар 1731 мектепке Starlink жерсеріктік интернеті қондырылды, ал шекара маңындағы 137 мектепте терминалдарды жандандыру жұмыстары жүргізілуде.
«Мемлекеттің басым міндеті балалардың қауіпсіздігін қамтамасыз ету және олардың құқықтарын қорғау болып қала береді. Өртке қарсы және терроризмге қарсы қауіпсіздікті қамтамасыз ету, дабыл түймесінің, бейнебақылау жүйесінің, турникеттердің және лицензияланған күзеттің міндетті болуы жөніндегі талаптар күшейтілді. Алғашқы рет білім беру ұйымдарын қауіпсіздік жүйелерімен барынша жарақтандыру қамтамасыз етілді», — дейді министр.
Заманауи 1000 пәндік кабинетпен жарақтандыру, 1000 ауыл мектебін 7 бағыт бойынша жаңғырту бойынша жобалар жүзеге асырылуда. Атап өту керек, биылғы жылы робототехника, химия, биология, физика және STEM-зертхана бойынша 1383 кабинет сатып алу жоспарланған.
Айта кетейік, Түркістан өңірінде 400 мыңнан астам отбасыда 900 мыңнан аса бала өмір сүруде. Оларды зорлық-зомбылықтан және қатыгездіктен қорғау, түрлі қылмыстың алдын алу маңызды мәселе. Балалардың қауіпсіздігі мақсатында Түркістан өңіріндегі 938 білім беру мекемесі 100 пайыз дабыл батырмаларымен қамтылып, Жедел басқару орталығына қосылған. Оның 909-ы мектеп, 25-і колледж және 4-еуі балалар ауылы мен жасөспірімдер үйі. Кәсіби күзет қызметімен қамтамасыз етілуі тиіс бала саны 300-ден жоғары 573 білім беру ұйымы толық лицензияланған күзет қызметіне өтті. Техникалық мүмкіндігі жоқ 145 мектепті қоспағанда жедел басқару орталығына 764 мектеп қосу жоспарланды. Өңірде «Қауіпсіз мектеп» жобасы да сәтті жүзеге асуда. Облыстағы 191 білім беру ұйымының 102 шақырым қоршауы жаңартылды.
