Президент тапсырмасы: Ауылды дамыту — ұлт саулығына негіз

Қазақстан Республикасының Президенті Қасым-Жомарт Тоқаев өзінің жыл сайынғы Жолдауларында денсаулық сақтау саласын жаңғырту, медициналық қызметтердің қолжетімділігі мен сапасын арттыру мәселелеріне ерекше көңіл бөліп келеді. Президенттің «Халық бірлігі және жүйелі реформалар – ел өркендеуінің берік негізі» атты Жолдауында айтылған: «Басты міндет – халықтың денсаулығын сақтау. Медициналық инфрақұрылымды дамыту – ел болашағына салынған инвестиция» деген сөздері нақты іспен дәлелденіп келеді.

Осы бағыттағы жұмыстардың нақты көрінісі ретінде 2025 жылғы 15 шілдеде Түркістан облысы, Шардара ауданының Ұзыната елді мекенінде жаңа медициналық нысанның құрылысы басталды. Бұл жобаны «Шардара аудандық орталық ауруханасы» ШЖҚ МКК үйлестіруде, ал негізгі инвестор — «SC MAGNAT» ЖШС. Жоба аясында 0,50 гектар жер телімі бөлініп, алғашқы құрылыс жұмыстары — жер тегістеу және іргетасқа дайындық кезеңі қарқынды жүргізілуде.

Ұзыната елді мекені үшін бұл жоба — көптен күткен жаңалық. Себебі бұған дейін ауыл тұрғындарының алғашқы медициналық көмекке жүгінуі үшін шалғайдағы аудан орталығына баруға мәжбүр болатын. Жаңа нысан іске қосылғаннан кейін алғашқы медициналық-санитарлық көмек, тәулік бойғы амбулаториялық қызметтер және шұғыл медициналық көмек көрсету мүмкіндіктері ауыл тұрғындарының өз ортасында қолжетімді болмақ. Қазіргі таңда құрылыс алаңына құм, тас, тақтай секілді негізгі құрылыс материалдары жеткізіліп, іргетас құю жұмыстарына дайындық аяқталу сатысында. Жобаның құрылыс барысы кезең-кезеңімен қадағалануда, әрі белгіленген мерзім ішінде толық аяқталып, пайдалануға берілуі көзделуде.

Қасым-Жомарт Тоқаев өз Жолдауларында ауыл тұрғындарының өмір сүру сапасын арттыру үшін денсаулық сақтау мен білім беру инфрақұрылымын ауылдарға жеткізуді басым бағыт ретінде атап өткен. Жолдауда: «Ауылдық жерлерде медициналық инфрақұрылымды жаңарту қажет. Ең алдымен, фельдшерлік-акушерлік пункттер мен дәрігерлік амбулаториялардың желісін кеңейту керек», — деп нақты тапсырмалар берілген. Ұзынатадағы жаңа медициналық нысан осы мемлекеттік бастамалармен тікелей үндеседі. Бұл — орталықтан шалғай жатқан ауылдардың тұрғындарына медициналық көмектің қолжетімділігін қамтамасыз ететін маңызды қадам. Сонымен қатар, бұл жоба жергілікті инфрақұрылымды жаңғырту, жаңа жұмыс орындарын ашу және әлеуметтік тұрақтылықты нығайтуға да өз үлесін қосады.

Шардара ауданы әкімдігі мен денсаулық сақтау мекемелері ауыл медицинасының сапасын арттыруға бағытталған жүйелі жұмыстарды қолға алып отыр. Тек Ұзыната емес, ауданның басқа елді мекендерінде де медициналық қызмет сапасын көтеруге бағытталған жобалар қолға алынуда. Бұл — ҚР Президентінің «Ауыл – ел бесігі» бағдарламалық бастамаларының шынайы жалғасы.

Медициналық қызметке қолжетімділік артқан сайын, ауыл тұрғындарының өз жерінде сапалы ем алу мүмкіндігі де кеңейеді. Бұл жағдай халықтың әлеуметтік көңіл күйіне оң әсер етіп, ауылда тұрақты өмір сүруге ынталандырады. Жаңа нысан іске қосылғанда, ауылдың әрбір тұрғыны дер кезінде көмек алып, өз денсаулығын жергілікті деңгейде сақтай алады.

Медициналық инфрақұрылымды ауылдарға жеткізу арқылы мемлекет «Ешкім ұмыт қалмайды» деген басты қағиданы берік ұстанып келеді. Ұзынатадағы бұл нысан – халықтың әл-ауқатын арттыруға арналған нақты қадам. Ол – ел болашағы үшін салынған инвестиция. Демек, бұл тек құрылыс емес, сенімді, қолжетімді, сапалы медициналық қызметке жасалған жол. Бұл жобаның табысты жүзеге асуы – ауыл тұрғындарының өмір сапасын арттырудағы маңызды қадам болмақ. Мемлекет басшысының тапсырмаларына сәйкес, мұндай бастамалар алдағы уақытта еліміздің өзге де ауылдарында жалғасын табары сөзсіз.