«Халық үніне құлақ асатын мемлекет» қағидасы Ошақтыда жүзеге асып жатыр

Мемлекет басшысы Қасым-Жомарт Тоқаев өзінің Жолдауларында өңірлерді дамыту – елдік тұрақтылықтың кепілі екенін баса айтып келеді. Президент атап өткендей, «Халық үніне құлақ асатын мемлекет – бұл ең алдымен нақты нәтиже беретін, жергілікті жерде халықтың мүддесіне қызмет ететін билік». Осы ұстанымды басшылыққа алған Келес ауданындағы Ошақты ауылдық округінде соңғы жылдары ауқымды істер атқарылуда. Биылғы жылдың алғашқы жартыжылдығындағы нәтижелер округтің әлеуметтік-экономикалық әлеуетін арттыру жолында нақты қадамдар жасалғанын көрсетіп отыр.

Ошақты ауылдық округінің әкімі Мақсат Мырзамұратовтың айтуынша, ауыл тұрғындарының әл-ауқатын арттыру – Үкіметтің басты міндеттерінің бірі әрі бұл бағыттағы әрбір қадам – стратегиялық маңызы бар іс. Биыл округке қарасты алты ауылда газ құбырының құрылысы жүргізілуде. Бұл – тек тұрмыстық жайлылық емес, сонымен қатар ауыл экологиясына, қауіпсіздігіне тікелей әсер ететін шешуші фактор. Президент Жолдауларында бірнеше рет айтылғандай, елді мекендерді газдандыру – әлеуметтік әділеттіліктің бір көрінісі.

Ошақты округінің барлық 13 елді мекені орталықтандырылған ауыз сумен қамтылған. Жаз мезгілінде туындайтын тапшылықтың алдын алу үшін үш ауылда су тазартқыш құрылғылар орнатылды. Бұл – Мемлекет басшысы ұсынған «Таза ауыз су – әрбір азаматтың құқығы» деген қағиданың нақты жүзеге асуы.

Электрмен қамту мәселесінде де тың жобалар қолға алынуда. Қазіргі таңда электр желілерін жаңарту бойынша жобалық-сметалық құжаттар дайындалып, 7500 метрге жуық көше жарығы орнатылды. Бұл – ауылдардың қауіпсіздігін арттырып, тұрғындардың өмір сүру сапасын жақсартуға бағытталған маңызды шешім.

Абаттандыру мен көркейту жұмыстары бойынша да елеулі өзгерістер бар. Қоғамдық кеңістіктер жаңартылып, демеушілердің көмегімен аркалар мен аллеялар салынды. Каналдар мен арықтардың механикалық тазартылуы – ауыл шаруашылығы мен тұрмыстық су айналымының тиімділігін арттыруға ықпал етеді. Бұл – агроөнеркәсіптік салаға жан бітіріп, еңбек өнімділігін еселеуге жол ашады.

Мемлекет басшысы Қ.Тоқаев «Ауыл – ел бесігі» жобасының маңызын бірнеше рет атап өткен. Осы бастама аясында Ошақты округінде де бірқатар әлеуметтік нысандардың құрылысы басталды. Атақоныс ауылында 69 млн теңгеге фельдшерлік-акушерлік пункт салынып жатыр. Бұдан бөлек, тағы екі елді мекенге фельдшерлік пункттер салу ұсынылған. Бұл – алғашқы медициналық көмектің қолжетімділігі мен сапасын арттыруға бағытталған игі қадам.

Білім саласына да айрықша назар аударылуда. Сарыжылға ауылында 200 орындық мектептің жобасы дайындалып жатыр. Ал Ошақты ауылында жаңа мектеп салуға арнайы жер телімі бөлінді. Президент Тоқаев айтқандай, «Білім – ұлттың жаңа болмысын қалыптастыратын басты күш». Демек, бұл бастамалар ауыл жастарының болашағына жасалған инвестиция болмақ.

Спорт пен мәдениет те назардан тыс қалған жоқ. Бірнеше ауылда заманауи футбол алаңдары салынып, Ошақты ауылындағы спорт кешенінің құжаттамасы дайындалған. Бұл – ауыл жастарының салауатты өмір салтын ұстануына, бос уақытын тиімді өткізуіне мол мүмкіндік береді.

Жол мәселесіне келсек, 2025 жылы 12,2 шақырым жолға асфальт төселіп, 12,4 шақырым көше шағал тасты жолмен қамтылады. Инфрақұрылымдық бұл шешімдер ауыл ішіндегі көлік қатынасы мен тұрғындардың қозғалысын жеңілдетіп, ауылдардың ажарын аша түседі.

Мемлекеттік деңгейде қабылданып жатқан шешімдер мен жергілікті әкімдіктің нақты қадамдары бір мақсатқа – азаматтардың өмір сүру сапасын арттыруға бағытталған. Президент Тоқаев өз сөзінде: «Біздің басты міндетіміз – өңірлерді дамыту арқылы тұтас елдің әл-ауқатын көтеру» деп атап өткен болатын. Ошақты ауылдық округіндегі атқарылған және алда жүзеге асырылатын жұмыстар – осы ұстанымның жергілікті деңгейдегі шынайы көрінісі.

Мұндай игі бастамалар ел мен халық арасындағы сенімді нығайтып, азаматтардың мемлекеттің болашағына деген сенімін арттырады. Ошақтының бүгінгі келбеті – осыны айғақтайды.