Жолдау жүктеген міндет: Абай ауылындағы автожол кеңейтілді

Қазақстан Республикасының Президенті Қасым-Жомарт Тоқаев өз Жолдауларында және бірқатар ресми баяндамаларында көлік-логистикалық инфрақұрылымды жаңғырту – экономиканың тұрақты дамуы мен өңірлердің әлеуетін толық іске асырудың негізі екенін бірнеше рет атап өткен болатын. Мемлекет басшысы өз Жолдауында: «Заманауи жол-көлік инфрақұрылымы – өңірлердің дамуына серпін беретін маңызды фактор. Инфрақұрылым халықтың өмір сапасына тікелей әсер етеді» – деп нақты міндет қойған.

Осы бағытта Түркістан облысында, соның ішінде Келес ауданында ауқымды жұмыстар жүргізілуде. Атап айтқанда, республикалық маңызы бар а-15 автожолының Келес ауданы, Абай ауылы тұсындағы бөлігі кеңейтіліп, орта жөндеу жұмыстары қарқынмен жүргізілуде. Бұл – аймақтың көлік қатынасы мен әлеуметтік-экономикалық дамуына оң әсер ететін маңызды жоба. Қазақстан Республикасы Парламенті мен Үкіметі қабылдаған «жол картасы», «Нұрлы жол», «Ауыл – ел бесігі» бағдарламалары көлік инфрақұрылымын жүйелі жаңартуға бағытталған. Осы бағдарламалар шеңберінде жол сапасын арттыру, апаттылықты азайту, елді мекендер арасындағы көлік қатынасын жақсарту басты басымдық ретінде белгіленген.

Мемлекет басшысы өз сөздерінде жол сапасының төмендігі мен инфрақұрылымның жетілмегендігі өңірлік дамуға кері әсер ететінін бірнеше мәрте ескертіп, нақты шаралар қабылдауды тапсырған болатын. Абай ауылы тұсындағы автожол учаскесіндегі жөндеу жұмыстары — инфрақұрылымды жаңғырту мен қауіпсіздікті арттыру бағытындағы кешенді жоба. Бұл жұмыс жолды тек жөндеп қана қоймай, оны заманауи стандарттарға сай кеңейтіп, абаттандыруды да қамтиды. Сонымен қатар, жол жиегінде заңсыз салынған құрылыстарды алып тастау арқылы қозғалыс жолақтарын кеңейту және көлік ағынын қауіпсіз ету көзделген.

Жол жөндеу барысымен танысу мақсатында Келес ауданы әкімінің орынбасары Мақсат Тұрдиев пен аппарат басшысы Бақтияр Абдрахманов жұмыс учаскесіне барып, мердігер мекемелерге бірқатар нақты тапсырмалар берді. Олар құрылыс сапасына баса назар аударып, белгіленген мерзімде аяқталуын қадағалауды ескертті. Бұл – жергілікті атқарушы биліктің мемлекеттік тапсырмаларды тікелей бақылауда ұстап отырғанының айғағы. Жөндеу жұмыстары жүргізіліп жатқан кезеңде тұрғындар мен жолаушылардың қауіпсіз қозғалысын қамтамасыз ету – басты назарда. Осы орайда арнайы айналма жолдардың сызбасы әзірленіп, көлік қозғалысының үзілмеуі үшін нақты шаралар қабылдануда. Бұл өз кезегінде жергілікті тұрғындардың тұрмыс-тіршілігіне кедергі келтірмей, құрылыстың сапалы әрі жүйелі орындалуына мүмкіндік береді.

Мемлекет басшысы өз Жолдауында: «Жол сапасы – бұл жай ғана инфрақұрылым емес, бұл – адамдардың күнделікті қауіпсіздігі мен жайлылығы» – деп атап өткен болатын. Келес ауданында атқарылып жатқан жұмыстар осы тұжырымның нақты іске асып жатқан көрінісі десе болады.

Жол құрылысы саласындағы ең басты талаптардың бірі – сапа мен ұзақ мерзімділік. Осы мақсатта жөндеу жұмыстары барысында техникалық бақылау шаралары қатаң жүргізілуде. Сонымен қатар, қоғамдық кеңес мүшелері мен белсенді азаматтар да құрылыс барысын ашық бақылап отыр.Түркістан облысының даму жоспарына сәйкес, жол инфрақұрылымын жетілдіру – облысты инвестициялық тұрғыдан тартымды ету мен тұрғындар үшін қолайлы орта қалыптастырудың негізгі тетігі. Осы бағытта жүргізіліп жатқан жол жөндеу жұмыстары – тек көлік қозғалысын ғана емес, жалпы экономикалық және әлеуметтік өсімді қамтамасыз ететін маңызды фактор.

Абай ауылы маңындағы а-15 автожолының кеңейтіліп, жаңғыртылуы – келес ауданындағы маңызды инфрақұрылымдық жобалардың бірі. Бұл жоба арқылы көлік қозғалысы жеңілдеп, жол қауіпсіздігі артады, ал тұрғындар үшін жайлы әрі қауіпсіз орта қалыптасады.

Мемлекет басшысының тапсырмаларын орындау жолында парламент, үкімет және жергілікті өзін-өзі басқару органдарының үйлесімді жұмысы – еліміздің тұрақты дамуының кепілі. Келес ауданындағы бұл бастама Түркістан өңірінің көлік жүйесін жетілдіру бағытында жасалған маңызды қадам болып саналады.