Балалық шаққа жол ашқан жаз – Төлеби төріндегі шаттық ордасы
Жаз – баланың көңіліне еркіндік пен шаттық сыйлайтын мезгіл. Бұл тек демалыс емес, бұл – жаңа таныстықтар, қызықты ойындар, өнер мен армандар тоғысатын шақ. Түркістан облысы Төлеби ауданында биыл балалар үшін ұмытылмас жаз ұйымдастырылып отыр. Таудың баурайында, табиғаттың тынысы кең тынығу орнында жаңадан бой көтерген модульді жазғы лагерь – сол бақытты балалық шаққа апарар жол. Бұл – жай ғана лагерь емес. Бұл – әр баланың жаңа өмір тәжірибесін жинайтын, өз әлеуетін ашатын орта. «Төлеби нұры» деп аталған лагерь биыл алғаш рет есігін ашты.
Әзірге алғашқы ауысымда Қазығұрт ауданынан 300-ден астам оқушы келіп, шатырлар тігіп, бассейнде шомылып, түрлі байқаулар мен сайыстарға қатысып үлгерді. Ал жаз бойы 2000-нан аса бала осы жерде демалмақ.Модульді лагерь – бұл заман талабына сай, жылдам тұрғызылған, бірақ жылы, жайлы және барлық жағдайы қарастырылған шағын үйлер. 14 модульді нысанның әрқайсысы 20 балаға арналған. Іші жарық, жаңа жиһаздармен жабдықталған, санитарлық жағдай жоғары деңгейде. Қыздар мен ұлдарға арналған бөлек душ, әжетхана, кең асхана, ойын алаңдары – бәрі де балалардың жайлы тынығуы үшін жасалған.Бірақ лагерьді тек ыңғайлы ғимараттармен өлшеуге болмайды. Мұндағы басты құндылық – мазмұн. Бес мезгіл тамақтану, күнделікті ойындар, шығармашылық сағаттар, спорттық жарыстар, интеллектуалды байқаулар мен ұлттық тәрбиеге бағытталған бағдарламалар – мұның бәрі балалардың бос уақытын мәнді өткізуге арналған. Әр бала өзін еркін сезінеді. Бұл ортада ұялу да, шеттетілу де жоқ. Мұнда тек достық пен ортақ қызығушылық бар.
Мұндай бастамалар – жай ғана өңірлік жоба емес. Бұл – Мемлекет басшысы Қасым-Жомарт Тоқаевтың ел болашағына бағытталған әлеуметтік саясатының тікелей жалғасы. Президент өз жолдауларында балалардың құқықтары мен мүмкіндіктерін кеңейту, қауіпсіз әрі сапалы демалыспен қамту, шығармашылығын дамыту сияқты маңызды міндеттерді атап өткен. Төлеби ауданындағы лагерь – осы талаптардың нақты іске асқан көрінісі. Елімізде жазғы демалысты ұйымдастыру – мемлекеттік деңгейде қолға алынған ауқымды жұмыс. Түркістан облысында 43 мыңнан астам оқушы түрлі лагерьлерде тынығады. Бұл қатарда 10 мемлекеттік, 24 жекеменшік лагерь, сондай-ақ мектеп жанындағы демалыс топтары мен танымдық экскурсиялар бар. Жергілікті басқармалар мен білім мекемелері бұл істі бірлесе атқарып, әр баланың жазын ұмытылмас етуге күш салуда.
Жазғы лагерь – балаларды қылмыстан, көшенің қаупінен, әлеуметтік тәуекелден қорғаудың да бір жолы. Олар бұл жерде бос уақытын пайдалы істермен өткізеді, өзін-өзі таниды, достасады, ойлайды, дамиды. Ең бастысы – баланың көзі күліп тұрады. Бұл – кез келген мемлекеттік бағдарламадан да маңызды нәтиже. Бүгін лагерьде шаттыққа бөленген бүлдіршін – ертеңгі ел тірегіне айналады. Төлеби төріндегі лагерь – осы парыздың адал атқарылып жатқанын дәлелдейді. Бұл лагерьде тек демалыс емес, тұлғалық даму, достық пен өзіне деген сенім қалыптасады. Осындай бастамалар арқылы біз жарқын болашақтың іргесін бүгіннен бастап қалаудамыз.
