Түркістан облысының полицейлері жүргізушілерге позитивті сөздер жазылған парақшалар таратып, жол ережесін сақтауға шақырды

Түркістан облысының полицейлері жол-көлік оқиғасының алдын алу мақсатында жаңа бастаманы қолға алды. Көшеде көліктерді тоқтатып, жүргізушілерге позитивті сөздер жазылған парақшалар таратты. Сондай-ақ, жол ережесін сақтау қажеттігін ескертіп, түсіндірме жұмыстарын жүргізді. Ал, жол ережесін бұзбаған автокөлік иелеріне естелік ретінде ізгі тілектер мен ықаласты сөздер жазылған естелік биркаларын ұсынды.
Мәселен, парақшаларда «Сіз — жол ережесін қатаң сақтайтын жүргізушісіз», «Сіз — сұлу да сымбатты жансыз», «Сіз – ардақты атасыз», «Сіз – жол ережесін бұзбайтын үздік жүргізушісіз», «Сіз – бауырмал жансыз», «Сіз – жол қауіпсіздігіне кедергі келтірмейтін жүргізушісіз» — деген жазбалар бар.
Көлік жүргізушілері жол патрульдік полицейлері көлікті тоқтатуға нұсқау берген кезде іштей қобалжу болғанын айтты. Ал, ықыласқа толы естелік парақшасын ұсынған кезде ерекше әсерге бөленгендерін жеткізді.