Ашық диалог – нақты шешім: Арыс ауылдарында оң өзгерістер басталды

Арыс қаласының әкімі Қайсар Маңқараев жақында Байтоғай мен Шағыр ауылдарында болды. Жай ғана ресми сапар емес, бұл – тұрғындармен ашық әңгіме, бірге шешім іздеу жолы. Байтоғайда ауыл тұрғындары басты сұрақтарын айтты: ішкі жолдарды жөндеу, түнгі жарық орнату, ауыз су мәселесі, егістік жерлердің жағдайы – барлығы өзекті. Әкім бұл мәселелердің бәрі назарда екенін, биыл үлкен жұмыстар басталатынын жеткізді. Жаңа су сорғылары, асфальт төселетін көшелер, аудандық жолдағы ағын суды реттеу – бәрі тұрғындардың ұсынысы бойынша жүзеге асады. Атап айтқанда, биыл Байтоғай ауылында ауыз су жүйесіне жаңа су сорғылары орнатылмақ. Сонымен қатар, ауылішілік көшелерге асфальт төсеу жұмыстары да жоспарға енгізілген. Бұдан бөлек, Қожатоғай мен Байтоғай елді мекендерін жалғайтын аудандық маңызы бар жол бойына ағын судың өту мүмкіндігін арттыру мақсатында арнайы тюбинг орнату көзделіп отыр. Мұның барлығы тұрғындардың ұсынысымен қолға алынған игі істердің нәтижесі. Және де әкім ауылдың бұрынғы түлектері салған көрікті саябаққа барды. Қуаныш пен мақтаныш сезімімен серуендеді. «Осындай жақсылықтар көп болса», – деді ол. Қайсар Маңқараевтың айтуынша, ауылға осындай ірі әлеуметтік игіліктер керек. Жастар да, үлкендер де сол үшін бірлесіп, ауылды дамытудың жолын табуы тиіс.Шағыр ауылында да мұндай тіршілік тынысы сезілді. Ауыл тұрғындары су мен жарыққа, жолға қатысты өтініштерін айтты. Әкім оларды тыңдап, шешімнің кезең-кезеңімен табылатынын сендірді. «Бюджет мүмкіндік береді, біз жоспар бойынша жүреміз», – деді Қайсар Зәкірұлы.

Бұл кездесулер – ел Президенті Қасым-Жомарт Тоқаевтың ауылды дамыту саясатының көрінісі. Мемлекет басшысы жыл сайынғы Жолдауында ауылды алға сүйреу – елдің болашағын нығайту деп атап өткен. Арыс әкімдігі де осы бағытта табанды жұмыс істеуде. Тұрғындар мен билік арасындағы осындай ашық, шынайы диалог – жақсы нәтиженің кепілі. Әр мәселе мұқият тыңдалып, нақты жоспарға енгізіледі. Бұл – халықтың сенімін арттырып, елді мекендердің жайлы әрі дамыған болашағына жол ашады. Арыс қаласында бүгінгі күні шағын ауылдардың тынысы осылай өзгереді. Қайсар Маңқараев пен оның командасы ауылды бірге көтеруге ниетті, әрі сенімді. Ал тұрғындар өз ауылының болашағына үлес қосуға дайын. Ауыл — елдің ұйытқысы. Сол ұйытқы мықты болса, мемлекет те берік болады. Сондықтан елдің әр азаматы өз жерінің тағдырына бейжай қарамауы тиіс. Президент Қасым-Жомарт Тоқаев өзінің Жолдауында: «Ауыл – еліміздің рухани және экономикалық негізі. Оны дамытып, жасампаздықты арттыру — біздің басты міндетіміз» — деген болатын. Бұл сөздер Арыс әкімінің ауыл тұрғындарымен кездесулеріндегі ұстанымымен толық сәйкес келеді. Қиындықтар мен талаптарды тыңдап, нақты шешімдер қабылдау арқылы ғана ауылды жаңғыртып, елдің болашағын бірге құруға болады. Сондықтан да Байтоғай мен Шағырда қолға алынған жұмыстар – тек бастама ғана, алда әлі талай жақсылықтар күтіп тұр.