Кентауда жарықтандыру жүйесі жаңғыртылуда
Қазақстан Республикасының Президенті Қасым-Жомарт Тоқаев Қазақстан халқына арнаған Жолдауында «Қалалар мен елді мекендердің келбеті мен тұрғындардың өмір сүру сапасын жақсарту үшін жайлы, қауіпсіз орта қалыптастыру қажет. Бұл – көше жарығы, абаттандыру, қоғамдық кеңістіктерді дамыту сияқты нақты істерден басталады» деп атап өткен болатын.
Осы бағытта Кентау қаласында тұрғындарға жайлы әрі қауіпсіз орта қалыптастыру үшін кешенді жұмыстар жүзеге асырылуда. Соның ішінде, қала көшелерін жарықтандыру мәселесі басты назарда тұр.
Бүгінгі таңда Кентау қаласы бойынша 254 көше жарық шамдармен қамтылған. Жалпы саны 3 610 дана көше жарығы орнатылған. Сонымен қатар, қаладағы 331 көпқабатты тұрғын үйдің ауласында қосымша 680 дана жарық шамы жұмыс істеп тұр. Бұл – қаланың түні бойы жарық әрі қауіпсіз болуын қамтамасыз ететін маңызды инфрақұрылым.
Қала көшелеріндегі жарықтандыру жүйесінің қамту көрсеткіші 98% құрап отыр. Бұл көрсеткіш елдегі орташа деңгейден едәуір жоғары. Алайда, әкімдік тарапынан бұл көрсеткішті 100%-ға жеткізу мақсатында нақты шаралар қабылданып отыр.
Көше жарық шамдарының толық қамтылуын қамтамасыз ету мақсатында қалалық бюджет есебінен қаржыландыру көзделіп, жобалық-сметалық құжаттама әзірленді. Қазіргі таңда бұл жоба қалалық бюджеттік өтінімге ұсынылып, қаржыландыру мәселесі қаралуда.
Жоба жүзеге асырылған жағдайда, жарықсыз қалған көшелер мен аула аумақтарына шамдар орнатылып, Кентау қаласының аумағы 100% жарықтандырумен қамтылатын болады. Бұл қала тұрғындарының түнгі уақытта қауіпсіз қозғалуына, құқықбұзушылықтың алдын алуға, сондай-ақ жалпы қаланың келбетін арттыруға зор ықпал етеді.
Президент Қасым-Жомарт Тоқаев өз Жолдауларында «Тұрғындарға жайлы өмір сүру ортасын жасау – мемлекет пен жергілікті атқарушы органдардың ортақ міндеті» деп нақты көрсеткен болатын. Көше жарығын тиімді ұйымдастыру – осы міндеттің ажырамас бөлігі.
Кентау қаласы әкімдігі бұл бағыттағы жұмыстарды жүйелі жалғастырып келеді. Көше шамдарының жай-күйі, техникалық жағдайы, уақытылы ауыстырылуы мен жаңартылуы – бақылауда. Қаланың энергия тиімділігін арттыру бағытында LED технологиялар қолданылып, электр қуатын үнемдеуге мүмкіндік беретін жүйелер де енгізілуде.
Кентаудағы көше жарығы – жай ғана шамдар жүйесі емес, бұл – тұрғындардың қауіпсіздігі мен өмір сапасының ажырамас бөлігі. Қазіргі таңда қаланың 98%-ы жарықтандырылған болса, алдағы уақытта 100% толық қамтуды қамтамасыз ету – басты мақсат. Жобалар сәтті жүзеге асқан жағдайда, Кентау – тек Түркістан өңірінің емес, жалпы еліміздің қауіпсіз әрі жайлы қалаларының бірі ретінде даму қарқынын сақтап қала береді.
