Кентауда «Жасыл ел» жастар еңбек жасағының жаңа маусымы басталды
Кентау қаласында 2025 жылдың маусым айында «Жасыл ел» жастар еңбек жасағының жаңа маусымы ресми түрде ашылды. Бұл – еліміздің экологиялық ахуалын жақсарту, жастарды еңбекке баулу және қоғамдық пайдалы іске тарту мақсатында жыл сайын жүзеге асырылатын дәстүрлі жоба.
Аталған жоба өңірлік жастар ресурстық орталықтары мен жергілікті әкімдіктердің бастамасымен ұйымдастырылады. Биылғы еңбек маусымы маусым мен шілде айларына жоспарланып отыр. Осы кезеңде Кентау қаласында 60 жас еңбек жасағының құрамына қабылданып, түрлі абаттандыру, көгалдандыру және санитарлық тазалық жұмыстарымен айналысады.
Жобаның басты ерекшеліктерінің бірі – қазіргі таңда қоғамда өзекті болып отырған NEET санатындағы (яғни, білім алмайтын, жұмыс істемейтін, оқудан тыс қалған) жастарды қоғамға бейімдеу, еңбекке араластыру. Осы санаттағы жастардың әлеуметтенуіне мүмкіндік беріп, оларды пайдалы істерге жұмылдыру – бағдарламаның негізгі бағыттарының бірі.
Қала аумағындағы саябақтар мен гүлзарлар, көше бойындағы жасыл желектер – жастар қолымен күтімге алынып, жаңа тал-дарақтар отырғызылатын болады. Бұл тек еңбек қана емес, туған өлкені аялауға, тазалық пен тәртіпке ұмтылуға бағытталған игі шара ретінде бағаланады.
«Жасыл ел» жасағы – тек еңбекке баулу емес, сонымен қатар жастардың бос уақытын тиімді өткізуіне, рухани-адамгершілік тұрғыда дамуына мүмкіндік беретін алаң. Жобаның аясында қатысушылар экологиялық мәдениетке тәрбиеленіп, патриоттық бағыттағы түрлі іс-шараларға қатысады. Сонымен қатар құқықбұзушылықтың, нашақорлықтың алдын алу, салауатты өмір салтын насихаттау сияқты бағыттар да қамтылады.
Қоғамдық пайдалы еңбек – жас буынның бойына жауапкершілік пен еңбексүйгіштік қасиеттерді дарытатын маңызды құрал. Бұл – жастардың азаматтық белсенділігін арттырып, туған жерге деген сүйіспеншілігін нығайтады.
Биылғы еңбек маусымының «Жасыл ел – жарқын болашақ кепілі» деген ұранының өзі көп нәрсені аңғартады. Ел болашағы – жастардың қолында. Ал жастардың болашағы – білім мен еңбек арқылы қалыптасары сөзсіз. Осы орайда «Жасыл ел» жобасының мәні – жас ұрпақты игі істерге жұмылдырып, ел игілігіне қызмет етудің үлгісін көрсету.
Айта кетейік, «Жасыл ел» бағдарламасы алғаш рет 2005 жылы Мемлекет басшысының бастамасымен қолға алынған болатын. Содан бері еліміз бойынша жүздеген мың жас көгалдандыру жұмыстарына қатысып, қоғам өміріне белсенді араласуда. Кентаулық жастар да бұл үрдістен қалыс қалмай, өз қалаларын көркейтуге күш салуда.
